政情：區議員拍開箱片 驚見播毒郵件

內有疑似用過口罩

荃灣區議員陳劍琴喺社交網站發布片段，話辦事處收到一封好厚嘅匿名信，一於決定同大家一齊拆信。之不過一打開封口，已經見到入面有一個疑似用過嘅口罩，擔心內有「生化武器」，於是即刻戴上手套。之後發現個口罩有啡色迹，陳劍琴就寸爆咁話，擔心嗰位市民嘅身體情況，如果係血漬嘅話，呼籲佢睇醫生，仲話「壞人命不久矣」。信入面仲有幾張剪報，包括年輕人喺反修例風波中被檢控同埋12港人蛇嘅新聞。

收到一封另類恐嚇信，陳劍琴都「嚴陣以待」，話已經小心處理咗封「播毒郵件」，仲揶揄口罩係用嚟防疫，唔係用嚟恐嚇其他人嘅，話「鼓勵」有關人士做啲對地球有貢獻嘅事喇。