中環出更:茶葉咖啡渣雞蛋殼種植法 麥美娟「夠薑」驅寒

天寒地凍,大家都要「各出奇招」保暖,作為女性尤其體虛怕凍,當然要更加着重禦寒喇。議員麥美娟(Alice)就習慣飲薑茶驅寒,仲連帶養成種薑嘅嗜好添。

Alice話身邊朋友都詫異佢作為一個「懶人」,點解會咁有心機玩種植呢?原來係有次佢買咗舊薑嚟沖薑茶,後來發現用剩嘅薑竟然天生天養,開始發芽,先知種薑根本唔使點打理,只要將用完嘅茶葉、咖啡渣、雞蛋殼等,當做天然肥料,咁就多多薑茶都有得飲,仲有「夠薑」嘅寓意添。Alice有兩隻愛犬,佢話「大女」一向會瞓喺張床嘅固定位置,至於「細女」平日會陪住Alice瞓覺,等到佢進入夢鄉就自行去客廳「看門口」。之不過呢排天氣實在太凍,「細女」都會捐入被竇一齊瞓,講笑話佢已經唔記得咗看門口喇!

另外一位議員陳恒鑌(Ben)話今年冬天,每個禮拜都打一次邊爐,仲專程買咗一個煲。Ben話特別鍾意食羊腩煲保暖,仲物色咗一間餐廳,售賣嘅羊腩煲一啲都唔羶,就連原本怕食羊肉嘅老婆,都好捧場添。好多人都會一邊歎啤酒,一邊食羊腩煲,之不過Ben竟然係配紅酒喎,唔通佢係驚有啤酒肚?Ben話驚凍就真啊,自己亦習慣飲紅酒。不過幾凍都好,Ben都堅持唔購置暖爐,話實在太嘥電喇!

梁福元:多走動就唔使着羽絨

天氣報告成日講到「新界氣溫再低幾度」,但十八鄉鄉事委員會前主席梁福元(福哥)就話唔怕凍喎!福哥話擁有強健體魄,先有強大嘅抵抗力同抗壓能力,而自己喺鄉郊地方長大,大半生人都喺山上山下、田裏園外走動,多走動就自然唔需要着羽絨喇。福哥又話呢個庚子年終於接近尾聲,期望大家繼續努力耕耘,令收穫更加豐富,香港再現生機啊。

卓妮

第一手消息請下載on.cc東網iPhone/iPad/Android/Windows Phone Apps