中環出更：無留意文件 梁志祥又甩轆
立法會工務小組委員會尋日開會，審議東涌新市鎮擴展等4個工程項目嘅撥款申請，上周五（8日）畀財務委員會主席陳健波話過「唔熟程序」嘅議員梁志祥（祥哥）再次「甩轆」，佢本來想指出工務小組委員會主席謝偉銓（Tony）判斷出錯，點知畀Tony話佢冇留意文件添！
Tony喺會議開始嘅時候話，鑑於有議員喺上周五財委會會議上質疑，點解3個經過工務小組討論同審議嘅項目冇討論環節，亦冇政府官員到場回應議員質詢，所以佢每次開會都會提醒同詢問議員有冇需要分開表決，議員就項目發言後，若覺得有需要分開表決可以即場提出，希望議員留意。
原想質疑謝偉銓出錯
祥哥聽到之後就話，上周五財委會討論屯門基建研究同元朗錦田南公屋發展，因兩者屬同一項目，其黨友、議員周浩鼎當時就提出分開表決，但去到財委會嘅時候，就冇咗屯門嘅討論，只係剩番元朗嘅項目，祥哥問Tony係咪只有元朗要討論？屯門就唔使？係咪咁嘅意思？
Tony再澄清，話周浩鼎出咗文件，只係要求元朗嘅項目分開表決，佢同時要求秘書處書面通知所有委員，可能祥哥冇留意文件， Tony又話祥哥其實隨時都可以提出討論有關項目，甚至喺財委會開會前一個工作天提出，希望大家留意自己關注需要分開表決嘅項目。
卓妮