早上上班時間，小剛在公司大堂看見小柔，便上前和她打招呼。小剛問：「早晨小柔，你做咩事呀？成對熊貓眼出晒嚟嘅。」小柔答：「早呀小剛。因為我尋晚失眠呀。」小剛好奇問：「唔會係因為你最近接咗張大單，壓力大到瞓唔着啩？」小柔答：「點解你會知嘅？」小剛說：「仲使講，公司有秘密網(口架)嘛。」
小剛續說：「咁使唔使我介紹一啲酣睡小貼士，等你瞓番覺好呢？」小柔答：「願聞其詳。」小剛道：「首先，你要明白每個人所需嘅睡眠時間各有不同，唔一定要達到某個睡眠時數，亦唔使同他人比較，因為一比較就有壓力，進一步影響睡眠。即使偶爾睡不好，只要放鬆心情，睡眠自然變好。」
小剛又說：「平日就要避免吸煙同飲咖啡、濃茶或含酒精飲品。因為佢哋含刺激性成分，會影響健康和睡眠質素。屋企舒適嘅睡眠環境都十分重要，睡房要保持寧靜，光暗和溫度適中，空氣要流通。瞓覺時就要暫時放低未完成嘅工作，等聽日繼續處理，唔好成晚為此煩惱。如果過咗20分鐘都未能入睡，可以做鬆弛活動，例如聽柔和音樂，等有睡意時先瞓覺。夜晚就避免睇或聽太刺激或令人情緒波動嘅媒體節目，以免影響入睡。」
小柔問：「咁你有冇啲驚慄懸疑片介紹？」小剛奇怪：「吓！你瞓唔着仲睇恐怖片！」小柔解釋：「好在你提吓我，等我今日食晏嗰陣睇番陣，醒一醒神先。如果唔係下晝開會瞓着咗就弊啦。」小剛問：「咁你鍾意睇殭屍定怪獸？」
職業安全健康局