中環出更：睹山頂垃圾遍地 龐愛蘭買架生自行清理
自己垃圾自己帶走，係文明人應有嘅表現，但好可惜，有部分巿民並無咁做。向來熱愛大自然嘅香港藥學會前會長龐愛蘭（Scarlett）日前上太平山頂緩步徑散步兼睇日出，點知就發現毗鄰嘅公園有個無蓋垃圾桶倒下，內裏嘅垃圾更加散落喺草地上，搞到Scarlett直呼「突然間變成嬲嬲豬」。
Scarlett指山頂係香港一個好重要且引以為傲嘅地標，點可以搞到咁污糟。佢認為有關部門應該放置大型有蓋垃圾桶，以免垃圾橫飛嘅場面再次發生。佢仲話當日已經即刻打去政府熱線，希望可以將電話駁到食物環境衞生署反映意見，惟未有人接聽電話。不過會再嘗試致電有關部門，又已經購買鐵夾同面罩等裝備，準備星期日同朋友一齊再上山頂突擊檢查，如果沿途發現有垃圾就會立即拾起。Scarlett呼籲市民應養成習慣，如到郊外地方有垃圾在身，應先袋住去到商場再作處理。
樹枝掛垃圾 魏綺珊嬲到震
沒有最離譜，只有更離譜。香港藝術發展局審批員魏綺珊都喺社交網站上載咗張相，仲貼文話「去行山，見到有人將垃圾掛喺樹上面，心裏講咗句粗口，再暗暗詛咒呢啲人！」點解嬲到心裏爆粗？睇到張相就知，事關有人將一包包裝住垃圾嘅膠袋綁咗上樹枝。咁有「創意」，都只係為咗唔帶走包垃圾，但就極度自私同破壞環境囉。
菁英會副秘書長馬家强就發現較為易行嘅郊野路段，遊人遺下口罩及紙巾等垃圾特別多，而佢就主張喺安全同體力皆許可嘅情況下，自發到郊野清理垃圾，以期感染其他人都作出倣效。馬家强話唔使多，只要每人行山幫手執走5件垃圾，郊野面貌就會靚好多。因此早前佢就同囡囡清理港島徑第5同第6段嘅垃圾，又強調人在郊野只應留下汗水，不應留下任何垃圾。
卓妮