政情：有相為證：馮程開西九網上會冇戴口罩
曾捲入「樓換樓」醜聞嘅政策創新與統籌辦事處前總監馮程淑儀，今個月7號借調到西九管理局出任署理行政總裁。返咗新工唔夠兩個禮拜，佢尋日首次出席西九文化區管理局董事局會議。由於疫情嚴峻，大家只可以睇網上會議，但喺現場開會嘅佢竟然冇戴口罩，真係唔驚爆疫或染疫？
講番到任前嘅嘢
馮程淑儀喺董事局會議上匯報西九嘅最新情況，但講嘅內容有啲係佢到任前嘅嘢，例如上個月中舉行香港故宮博物館大結構竣工儀式，有乜嘢嘉賓嚟，有幾多傳媒嚟採訪同報道。跟住佢又講吓，喺疫情下市民嚟唔到西九，但都可以透過網上睇啲多元化嘅節目等等。睇嚟佢仲係處於熟習階段喎。