政情：入隔離營安排龜速 蔣麗芸代政府解畫
第4波疫情仍然嚴峻，依家每日都有80幾單確診個案，雖則政府喺疫情初期，已經要求密切接觸者要入住隔離營，但政府當局喺接送佢哋入營方面，一直被批速度緩慢，議員柯創盛（柯仔）尋日喺立法會嘅預防及控制疾病相關的附屬法例小組委員會都有提出，炮轟局方安排入營嘅時間龜速之餘又唔透明，搞到市民好徬徨咁話。
唔認偏幫 籲畀啲時間
至於衞生署官員就賴日日咁多人確診，搞到依家每日都有200至300個檢疫人士等入營，佢哋已經派咗人手，會盡做喎。不過當柯仔追問「即係要等幾耐？會唔會有服務承諾？」時，委員會主席蔣麗芸（Ann姐）就幫住搶答：「答咗啦」，又解釋當局意思係會盡快做，但唔敢有服務承諾畀到你。Ann姐做埋個自動翻譯器，唔講真係以為佢係當局肚入面條蟲啊。
之但係，Ann姐事後都有兜番，話自己唔係幫政府啊，又指依家面對一個世紀大疫症，「唔好話柯議員你咁後生啊，我年紀咁大都未見過，所以畀啲時間啦」。其實年頭到依家，市民都畀咗好多時間喇，政府都係冇改善，普羅市民莫非真係只好逆來順受？