政情：運房難兼顧 麥美娟促拆局
運輸及房屋局負責房屋、公共運輸兩大政策範疇，社會有聲音指局方工作繁重，建議不如拆局處理。雖然運房局局長陳帆兩年前都講過，政府會考慮改組運輸及房屋局，若該局分拆，佢將有更多時間同能量，集中處理房屋相關政策，不過講完之就冇咗下文。尋日有議員重提將運房局分拆，而政府方面就回應話目前嘅首要工作係抗疫，分拆運房局就真係唔知要拖到幾時啦。
政務司司長張建宗尋日喺立法會回應有關分拆運房局嘅提問。張話政府對拆局持開放態度，之不過政府依家需要全力抗疫、重振經濟，同埋推行惠及民生嘅措施。張又話香港舊年爆發社會事件，今年又遇上疫情襲港，雖然政府承諾會改組，但改組涉及開設新決策局、人手配置、修例等程序，需要大量時間，希望社會體諒。張承認改組運房局係有少少遲咗，但覺得絲毫唔會影響本港嘅房屋同公共運輸政策。
寸徐英偉食糖水 可同時做嘢
張建宗嘅回應整整兩版半紙，但議員麥美娟（Alice）就發覺涉及拆局嘅部分其實只得半頁，質疑政府對於分拆運房局到底有幾大嘅決心。Alice引述上個月油麻地唐樓發生奪命大火期間，民政事務局局長徐英偉喺社交平台上載食糖水相片並解釋話「multitasking（同時做多件事）冇衝突」，即係政府官員同一時間都可以做好多嘢啦，但點解政府官員突然間又淨係可以抗疫，而抗疫嘅同時又唔可以進行拆局呢？
抗疫做得差 被斥如倒瀉籮蟹
當質詢環節結束，大家都以為Alice炮轟完政府嘅時候，佢又再次開火喇！佢見記者嘅時候話，工聯會今年就《施政報告》同政府會面嘅時候，已建議重組運輸及房屋局同埋發展局，工會方面認為應成立運輸工務局，負責所有運輸政策及基建工程，確保工程唔會超支、超時；另外成立房屋及發展局，集中處理增加土地及房屋供應嘅問題。佢話政府至今都未有時間表，質疑特首林鄭月娥係咪等連任後先至處理囉！鬧爆現時政府嘅抗疫工作又唔見得做得好，反而好似「無人駕駛，倒瀉籮蟹」咁！
其實唔單止運房局被質疑要拆局，有議員早前都批評食物及衞生局孭咁多嘢上身，但實際上根本兼顧唔到，好似依家疫情嚴峻，但食衞局嘅醫療又搞唔掂、街道衞生又懶懶閒，當時都促請政府將「食物」同「衞生」分番開，覺得反而更方便管理咁話。