中環出更：立會地下展覽廳將重開 傳召鐘任人試撳
舊年7月1日遭示威者闖入並大肆破壞嘅立法會大樓，修復工程陸續竣工，地下展覽廳所有設施嘅圍欄喺上月底已移除，重新開放看來指日可待！展覽廳唔單止有議員資料板，依家仲有個新設施，可以畀參觀人士試吓撳「傳召鐘」同埋「點名表決鐘」添！
原本放喺地下嘅展板，主要係向公眾同學生團體介紹立法會工作、議員、歷史，喺洗手間一帶仲設有長櫈供人憩坐。卓妮去睇過，介紹展板同長櫈就搬咗去立法會餐廳附近嘅位置，而本來設喺立法會3樓嘅歷史廊，依家就搬咗落地下喇，而原來嘅位置就圍咗板。
睇番介紹議員嘅展板，有齊晒今屆議員嘅資料，就連被取消資格、出任政府官員嘅前議員都有份，仲附帶埋任期。同時一撳議員資料就會出現QR code，只要用電話掃一掃就會連結至相關議員資料嘅立法會網頁，但只限現任議員，前議員就冇份啦！喺議員資料展板附近就有部機，唔單止介紹會議廳嘅情況，仲有兩個掣，分別係「傳召鐘」同「點名表決鐘」，卓妮試過撳，真係有鐘聲，但聲量就比較細。
議員柯創盛率先試吓新設施，仲大讚好貼地添！佢認為新增嘅展板可以增加議員同市民之間嘅互動，覺得可以好好咁善用資訊科技，仲建議喺各個地區做番類似嘅設施，咁就方便市民搵官員同議員。
麥美娟籲增互動裝置畀小朋友
另一議員麥美娟都有試玩，有帶過導賞團嘅佢就認為得一部機唔足夠，依家唔少小朋友都會鍾意撳吓、玩吓，得一部嘅話可能會出現爭住玩嘅情況，仲建議部機可以更新吓啲相添！對於將本來放喺3樓嘅歷史廊搬咗落地下，佢就覺得係好事，因為擺喺3樓都冇乜人睇喎。
立法會大樓開咗咁耐先有改善措施，唔知喺其他政府部門方面，要花幾耐時間先可以做到呢？
卓妮