政情：籲再推普及檢測 陳健波倡設賞罰制
政府日前公布首批疫苗明年1月到港，老人家同醫護人員等優先接種。但依家疫情仲爆發緊，經濟難以復甦，相信市民都擔心唔病死都窮死。保險界議員陳健波（波哥）日前就拍片暗斥政府向全民強制檢測說不，惟有再諗計阻止疫情擴散，佢建議政府再推普及社區檢測計劃，仲要加入賞罰制度。
建議與健康碼一齊重推
波哥覺得上次嘅普及檢測喺反對派嘅極盡抹黑同打壓下，仍有近180萬人參加，覺得可以加埋健康碼一齊重推，即係做咗檢測嘅市民可以優先接種疫苗，同時有健康碼後，佢哋出入公共場所可免受禁聚令限制、出入境亦可以唔使隔離咁話。
咁罰則又係乜嘢？波哥覺得有咁多好處同方便，市民反應一定好踴躍，久而久之冇做檢測同打疫苗嘅市民嘅壓力就愈嚟愈大，又話政府可以考慮要求唔肯檢測又唔打疫苗嘅確診者負擔部分醫療費喎。
其實喺上波疫情已有人提出有健康碼就可以出入公共場所，但社會分歧好大，而政府都冇積極回應，雖則今次加埋疫苗利誘，但疫苗來源亦已惹起好大爭議，會唔會利誘變咗趕客呢？