政情：區會「追求民主自由」掛曆揮春 疑遭內地扣查
兩個月後就係農曆新年，多個區議會都打算印製揮春、掛曆派畀區內街坊。但繼早前黃大仙區議會因印製「一生平安」揮春惹起爭拗後，油尖旺區議會所印製嘅掛曆、揮春同利是封，亦因印有「追求民主自由」字句，而畀人質疑該區利用公帑印製宣傳品，表達政治訴求或會引起不安同誤會，最後有關物品更懷疑畀內地海關扣查。
稱承辦商曾藉詞延派貨
該區區議會嘅節日慶典活動統籌委員會主席李偉峰前日喺社交平台貼文，話今年原定加入新嘅構思，包括發揚漢字中「合體字」精髓，將「招財進寶」同「追求民主自由」融入設計之內。承辦商早前就以「廠房無期」為由，將派貨日期延後，要喺12月中分兩批送到議員辦事處同指定地點，但到上星期佢哋先知道呢批物品畀內地海關扣查。
唔單止掛曆未送到，李偉峰話印有相同設計字句嘅揮春同利是封都懷疑被扣起。佢話上述嘅印刷品都係喺會上經過討論後，獲批出撥款印製，其中揮春涉款20至30幾萬元，原定明年1月到貨，但最近獲告知揮春被扣起，佢哋亦無辦法向承辦商證實原因。佢話喺呢段時間，唔少「藍絲」群組將「追求民主自由」一詞妖魔化成「港獨」，並將訊息轉發，又強調該區民政事務處喺會上亦未有干預掛曆及揮春等印刷品設計，佢批評「藍絲」係強行抹黑。