政情：政府疑似打茅波 開位申撥假撤回

鬧爆做法不君子 促勿做小動作

喺政府宣布撤回之前，其實早已喺財務委員會上陸續咁撤回部分開位建議，有部分仲要傾咗一陣就撤回添。面對依家經濟下行，當時都有唔少建制派議員喺會上質疑開位嘅重要性，又認為政府都要壓縮開支，唔可以胡亂開位。尋日正值內務委員會開會，繼關注防疫措施後，建制派議員就撤回開位建議提出質問，希望內委會主席李慧琼向政務司司長張建宗轉達。新民黨葉劉淑儀就質疑，政府到底係「真撤回」定係「假撤回」，同埋話議員只係對部分項目有意見，認為政府如果有需要，不妨可以先向立法會提交議案審議。

陳克勤就認為，議員審議政府開位嘅議案係以「是其是、非其非」、「實事實辦」嘅態度，如果冇需要就一定唔會支持。佢仲質疑，政府係咪想將啲開位建議放埋喺《財政預算案》，形容呢個做法係「打茅波」，鬧爆係不君子嘅做法，認為政府應堂堂正正咁向立法會提交議案，唔好做小動作，要求澄清咁話喎。

議員謝偉銓就話，多個首長級開設職位嘅議案因黑暴事件而遭拖延，認為政府的確有必要重新檢視相關職位係咪有需要開設，仲叫政府加快檢視唔好再拖。議員田北辰就認為政府唔應該矯枉過正，仲以鐵路拓展處為例，話有部分部門有增加人手嘅需要，政府應該要正視咁話喎。

泛民總辭 部分委會重選副主席

另外，因應班民主派議員總辭，立法會有部分委員會需要再重新選出副主席及委員，而尋日就分別選出議員謝偉俊、葛珮帆及張國鈞出任政府帳目委員會、議員個人利益監察委員會及議事規則委員會副主席。其中葛珮帆亦成為議事規則委員會委員。