政情：棄保潛英 學人呻窮 陳家駒眾籌撲簽證費
主張香港獨立、涉嫌觸犯《港區國安法》而遭警方通緝嘅反對派人士陳家駒，日前喺社交網站發出貼文，透露自己自今年6月初已棄保潛逃至英國領土。之不過，自己嘅旅遊簽證即將到期，又形容自己冇錢支付「Leave Outside the Rules（LOTR）」嘅相關申請開支，所以就發起眾籌撲水。
旅遊簽證下周到期
陳家駒早前被控舊年6月10日喺灣仔參與非法集結，保釋期間每星期都要到警署報到，但佢喺今年6月、即《港區國安法》實施前棄保潛逃。佢尋日喺貼文透露，自己早喺6月初已「流亡至英國領土」，期間一直依靠自己嘅積蓄同朋友幫忙應付日常開支。
佢又提到，自己所持嘅旅遊簽證將於12月5日到期，但就無力繳付LOTR所需嘅費用，所以發起眾籌撲水。所謂LOTR，係英國政府為BNO持有人而設嘅過渡性安排，申請人一旦獲批，可提前喺英國工作或就學。陳家駒話依家喺英國提出申請，需要支付LOTR嘅申請費以及醫療保健費合共2,500英鎊，即折合約2.6萬港元。之不過，佢發起嘅眾籌目標金額則高達4.5萬英鎊，即折合約46.7萬港元。