政情：李應生：港中醫料可到內地執業
早前特首林鄭月娥（林鄭）煞停原定10月中發表嘅施政報告，理由係要上京「爭取中央支持香港發展」。中醫中藥發展委員會委員李應生，就指林鄭赴京返港之後應該有好消息，並相信喺中醫界方面，預計可以落實本港註冊中醫同中醫學生到內地嘅公營中醫院工作或實習，鬆開以往只可以私人掛牌嘅限制，令佢哋有更多出路。
採單向輸出措施
據李所知，有關措施只限大灣區城市執行，為免爭拗，預料採取單向輸出嘅措施，即只有本港人員可以去內地公營中醫院執業或實習，但調番轉就唔得。另外仲會宣布，容許已經喺香港正式註冊嘅外用中成藥，只需透過簡易註冊嘅形式就可進入內地銷售添。
至於預計會喺2024年落成同啟用嘅將軍澳中醫醫院，李透露喺5份承辦機構嘅投標申請書中，東華三院、香港浸會大學同博愛醫院較有優勢，因為佢哋都有醫院同中醫門診嘅營運經驗，當中浸會仲設有頒授大學學位嘅中醫學院添。
李表示，中醫院將以自負盈虧嘅方式運作，並將會提供更多本地嘅中醫實習崗位。佢預料中醫院投入服務首年，政府會提供財政支援，而目前預計中醫院會提供政府資助嘅指定住院同門診服務，預計會佔醫院整體服務嘅50%至65%。