政情：區會民政擘晒面 徐英偉拆唔掂

其實喺新一屆區議會開波，雙方嘅關係已經唔和諧，而民政專員拉隊離場，始於大埔區議會成立「保安及政制事務委員會」，當時處方認為委員會職權範圍牴觸《區議會條例》，而有關委員會至今仍未能開展工作。實際上，亦有多項議程因為被指不屬區議會範圍，民政專員同部分官員離場，甚至民政事務處不支援區議會工作。

刻意唔撥款畀政府委任團體

喺撥款方面，今屆多區區議會都無設立「10‧1活動籌委會」同埋「7‧1活動籌委會」，而本年度用喺10‧1、7‧1及與警方相關嘅活動，金額大減1,800萬港元，當中唔少區會更將撥款歸零。另外，亦有區議會通過動議，唔再撥款畀政府委任嘅地區團體，以免撥款流入建制陣營的嘅口袋。此外，亦因為民政事務總署以疫情為由，扣減區議會逾1,300萬元嘅撥款，到頭來區議會就報復性削減與民政處相關嘅撥款，跟住又話怕今年用唔晒嘅錢，當局下年度削減撥款喎，希望酌情處理。

被指似遊樂場 區會當發噏風

徐英偉喺今年4月底上任局長冇耐，曾經形容區議會好似遊樂場，要守規矩先玩得開心，但係各區議會似乎當佢發噏風。「18區民主派聯絡會議」尋日總結大半年區議會嘅運作情況，指上任以嚟共有165項討論被民政事務專員指為越權並拒絕提供秘書支援，批評政府打壓同限制區議會運作，又話過去區議會容許討論政改問題、最低工資檢討、明日大嶼同區內圖書館館藏等民生議題，依家都畀民政事務處指為越權討論。

由議題、撥款、官員離場同支援開會等情況，就連徐英偉喺10月首次同各區區議會正副主席見面，會後都畀與會者批評嬉皮笑臉，又點會有互信吖！究竟區議會係遊樂場定係鬥獸場？徐英偉點修補關係抑或會更強硬應對？大家就要拭目以待嘞！