中環出更：新科技挑戰 劉燊濤：鐘錶業須求變
科技發展一日千里，事物推陳出新，雖帶來便利但亦會衝擊舊有事物。從事家族鐘錶生意嘅香港表廠商會常務副會長劉燊濤（Gary），旗下手錶產品雖精益求精，然而科技進步威脅到傳統手錶嘅銷路，因為好多消費者都轉為佩戴智能手錶，追趕潮流啊。
Gary日前係以得獎人嘅身份，出席香港工業總會舉辦嘅「香港青年工業家獎」頒獎典禮。為應對智能手錶嘅挑戰，Gary話應對之道就係將智能元素注入傳統手錶之內，令到傳統手錶亦具有計步同自動校時等智能手錶嘅部分功能。提及傳統鐘錶業轉型，Gary指香港鐘錶業喺生產方面缺少新血加入，而有經驗嘅師傅又往往被國際大品牌所羅致，裝配工人青黃不接嘅情況真係好棘手，不過更艱難都要求變。Gary又自爆細個時出於好奇心，會拆開一啲靚錶嚟研究，不過拆完就大件事喇，唔識回復原狀要搵人求救啊，又話好彩無揀貴錶嚟拆，如果唔係畀人「拆」開嘅就係佢啊。
霍欣茹：女性從事電訊有優勢
另一位得獎者霍欣茹（Annabel），就係從事電訊行業嘅揚眉女子。從事電訊行業者幾乎係男士嘅天下，當年Annabel喺大學選讀工程學課程，開課前佢以為全班只得自己一個女仔，但之後認真數一數就發現班上仲有其他女同學，不過就五隻手指數得晒。Annabel覺得女性從事電訊絕對有優勢，因為女性寥寥可數，傾生意嗰陣容易令人留下深刻印象。Annabel話適逢5G網絡發展嘅大時代，睇好工業界嘅應用，未來會投放更多資源擴大市場。
香港工業總會主席葉中賢（Daniel）話以前做生意只要「打理好間廠」就得，依家環境較為複雜，須顧及社會責任、科技應用等，講到自己嘅科技知識一定唔及年輕人，所以經常會同年輕員工交流，增進知識。Daniel深信即使現時工業界面對重重挑戰，仍然無阻工業界喺疫情新常態下重新制訂經營策略，勇於創新以及善用科技，可以令業務逆流而上咁話。
卓妮