政情：裁員潮殺埋身 拒推失業援助金 羅致光叫市民自力更生

「保就業」就完 冇計應對

議員葛珮帆直斥，若果政府喺年初研究失業援助金，依家可能已經推出。又指政府唔考慮畀市民提早領取強積金供款。勞工界議員陸頌雄就指，保就業計劃既然能夠喺短時間內推出，點解失業援助金就唔得呢？議員潘兆平則提到，好多工友放緊無薪假，但得唔到政府嘅津貼。議員鄭泳舜表示，政府嘅保就業援助即將於今個月完結，預料企業無可避免再爆裁員潮，要求羅交代會點樣應對。羅回應指，政府冇推算將來嘅失業率同裁員情況，會專注不斷探討點樣令經濟恢復，以降低失業率。

另外，提出質詢嘅議員鄭松泰，指部分國家正研究推行「全民基本收入」政策，政府喺不設資產或收入審查下，每月向所有公民派發定額款項，質詢政府會否考慮該政策。鄭又指政府對失業人士嘅統計，忽視自由工作者同人文行業，只係將佢哋歸類為公共行政或其他類別。

議員促再全民派一萬

羅回應話，外國嘅情況同本港不同，港府係希望市民能自力更生，故沒有考慮「全民基本收入」。羅續指，政府統計處嘅資料包括自僱人士，政府會一直關注並詳細探討協助自僱人士的方法，又重申任何有經濟需要人士，政府都有提供福利支援。

議員鄺俊宇就表示會繼續爭取政府再度全民派錢一萬元，而呢個亦係跨黨派嘅共識，又要求羅將意見反映畀行政長官聽。羅致光就回應指，既然一眾議員們都有呢個共識，相信特首係知道嘅，自己亦唔需要轉告喇。