喺舊年反修例風波被捕嘅示威者，當中不乏公務員，被外界質疑其公務員身份係咪政治中立，政府其後「補鑊」，要求今年7月1日或之後入職嘅公務員簽署聲明擁護《基本法》。公務員事務局局長聶德權尋日喺社交網站透露，今年7月1日至10月12日期間，逾2600名公務員已簽署有關聲明，至今未有公務員因不簽署而被終止聘任。
公務員事務局今年10月12日曾向各政府部門發出通告，要求所有在今年7月1日或之後加入政府的公務員簽署聲明擁護《基本法》、效忠香港特區，以及對特區政府負責，作為聘用條件的一部分。而在發出通告當日已經入職的有關人員，亦須簽署聲明。
據局方早前公布嘅資料顯示，截至今年9月底，已有46名公務員因涉嫌參與非法公眾活動被捕，正接受調查或正被起訴，其中23人為試用人員，佢哋全部已被停職。
被捕嘅公務員涉及紀律部隊同唔同部門嘅人員，包括消防員、救護員、海關、食環署、水務署、路政署、政務司司長辦公室同司法機關等。