政情:𠜎雞打算連任司庫𥄫實盤數

《港區國安法》實施下,泛民主派議員喺議會抗爭受掣肘外,估唔到亦成為政黨領導層換屆人選嘅重要考量。話說民主黨(白鴿黨)下月初就要改選領導層,其中現任司庫、「老鴿」單仲偕(𠜎雞)就表明有意坐多一屆,話喺港區國安法下要有一個較為資深嘅人睇實盤數喎,唔通係怕稍有差池踩界,令黨內資金被凍結?

近幾年白鴿黨都希望做到「去老年化」,為黨領導層注入新血。雖然𠜎雞喺2016年宣布「裸退」唔競逐中委會職位,但兩年後就因為黨友袁海文無意連任司庫,而被迫重出江湖。該黨下月6號就改選新一屆領導層,原本以為𠜎雞忙住做葵青區議會主席,頂咗兩年黨內嘅司庫都應該做夠皮,都係時候退位讓畀新血接任,點知佢就話有意做多一屆喎。唔通「老鴿」又想霸住個位?

同外國組織多來往隨時踩界

原來𠜎雞係考慮到港區國安法下,政黨司庫都感受到壓力,因為佢哋掌管住黨內盤數,任何資金來往都要小心睇實,仲話做司庫最緊要有政治敏感度,同時亦要低調不宜有太多政治曝光喎。都係嘅,泛民同外國組織咁多來往,又成日會接收捐款,一唔小心踩界,分分鐘令成個黨嘅資產被凍結,甚至亡黨都有之。

領導層換屆 傳胡志偉退火線

至於正、副主席人選方面,據悉現任主席胡志偉將會退下火線,該黨副主席、南區區議會主席羅健熙就有意競逐黨主席一職。觀塘區議員梁翊婷亦係參選副主席人選,但現任副主席尹兆堅就可能唔競逐連任。尹接受查詢時話,黨務同中委會唔太需要由立法會議員主導,反而應該由年輕世代肩負更重要一線黨內職位。

至於改行內閣制嘅公民黨(公文袋)喺今個月28號都會改選領導層,據了解,該黨元老及曾有意出戰立法會選舉嘅年輕黨員合組一張名單。其中,黨主席梁家傑同內務副主席賴仁彪將爭取連任,而譚文豪就會頂替陳淑莊競逐外務副主席一職。另外,曾打算出戰「超級區議會」及後退選嘅沙田區議員黃文萱、曾參加初選嘅東區區議員李予信,及被視為楊岳橋「Plan B」嘅大律師梁嘉善都喺名單內。

公文袋中人透露,本身想全新人出戰,但考慮到明年有選舉,最後都希望可以搵番啲有經驗嘅人傳承落去。不過,之前多個公文袋現任議員都被褫奪參選資格,就算接到棒都唔知係咪可以傳承啦!

第一手消息請下載on.cc東網iPhone/iPad/Android/Windows Phone Apps