中環出更：不滿泛民拉布 何君堯揚言革走許智峯
泛民最近喺開會期間，不斷藉點算法定人數嚟拖延時間，尋日仲喺口頭質詢期間，打斷議員何君堯嘅發言。何君堯尋日就痛斥泛民點人數係干擾立法會正常程序，將會全力推動對許智峯嘅譴責動議，同埋會去函特首林鄭月娥，促政府嚴肅跟進。
斥有議員想做洋奴可去外國
何君堯話，最近討論嘅議案冇乜爭議性，但攬炒派議員都要多次點算法定人數，令人困擾之餘仲嘗試推卸責任，話建制派議員冇坐齊先導致流會。何話反對派同香港攬炒不可接受，強調香港唔需要破壞分子，如果有議員甘心做洋奴就可以去外國。
對於許智峯前日阻礙佢發言，何君堯話許嘅行為係干擾議會正常運作，話絕對唔允許再出現類似情況，所以會全力推動對許智峯嘅譴責動議，務求取得3分2嘅議員支持，將許革走。何又話今日會去函特首，仲話律政司司長有權啟動DQ程序踢走許智峯，強調議員唔好以為《立法會（權力及特權）條例》係免死金牌，每個人做事都要承擔後果。
建制派議員麥美娟亦批評攬炒派議員不停拉布，對於立法會將處理議員許智峯嘅譴責議案，麥作為該調查委員會嘅主席，指有關報告早已完成，顯示論點確立，故會支持通過議案，並呼籲建制派議員屆時出席投票，確保議案獲得通過。
卓妮