政情：中環出更：或遭英除律師牌 何君堯斥政治攻擊
規管英國律師事務的律師管理局（Solicitors Regulation Authority, SRA），將會就議員何君堯喺2017年集會上表示要對港獨人士「殺無赦」言論召開聆訊，最終或會剔除何嘅註冊律師資格。何君堯尋日喺電台節目上提及事件，形容係政治攻擊。
何認為，投訴人嘅說法係故意歪曲事實，SRA係明顯受到誤導，又指當日佢係針對因兩項公眾妨擾罪罪成而被香港大學開除嘅法律系講師。何又提及舊年12月被其母校、英國安格里亞魯斯金大學褫奪名譽博士學位一事，指依家有人再重施故技，影響SRA，佢對於學術同法律專業嘅獨立性受影響感到傷心。
何又話，英國過去係其中一個備受尊重嘅地方，其法治同禮節亦係高尚文化嘅象徵，但依家已經再不復見，又指英國喺脫歐過後，社會上不斷有蘇格蘭獨立嘅聲音，喺地緣政治上英國首相約翰遜尋求美國總統特朗普嘅保護，並實行反中國政策同埋冷戰思維。
促港設量刑委會紓社會紛爭
對於舊年發生嘅反修例風波，何認為如要改善問題須從兩方面入手，包括改革司法同埋教育制度，話喺舊年黑暴事件中，有四成被捕人士都係學生，亦有過百名教師被捕，質疑本港嘅教育制度出現問題，點解有學生同教師會支持香港獨立，又同意關於香港缺乏國民教育嘅意見。至於司法方面，何認為增加法官可以加快處理部分審訊，又話喺部分引起公眾關注嘅案件中，其量刑備受質疑，設立量刑委員會能有助解決社會紛爭。
卓妮