政情：中環出更：秋日登高 曾鳳珠執垃圾護生態
步入秋天，唔少人趁住假日到郊野享受寧靜，同呼吸一下新鮮嘅空氣。之不過疫情之下，行山嘅人愈嚟愈多，部分熱門山徑嘅煩囂程度，隨時更勝市區，亦難免遺下唔少垃圾。香港菁英會主席曾鳳珠（Ellen）尋日出席該會同願景基金會等6個組織合辦嘅「齊心抗疫，共潔香港」活動，邊行山邊清理山上嘅垃圾。Ellen指郊野公園甚少垃圾桶，而就算有，都未必有人手及時清理，所以佢習慣自備垃圾袋嚟裝垃圾，保護環境又唔使清潔工人咁辛苦嘛！
Ellen指塑膠難以被自然分解，有時佢行山見到有人遺下嘅膠樽，佢都會順手執走。Ellen憶述有一次佢同幾位菁英會會員一齊行孖崗山，由於有一位會員行得比較慢，於是Ellen就打算激勵對方，透過手機訊息話已將一支能量飲品放喺俗稱「天梯」嘅山徑最高點。誰知對方行完山之後並無拎到飲品，Ellen愈諗愈唔安樂，最後更專程行咗959級樓梯去拎番支飲品添啊！
願景基金會副主席雷震東都係行得之人，更有10幾年參與毅行者嘅經驗。佢指近年多咗好多年輕人行山，不過論裝備，就似乎唔及得老一輩行山者咁齊全，好多時唔會自備水樽而係買支樽裝水就去行山。雷相信行山者有時都唔係故意喺山野亂拋垃圾，只係可能行行下唔小心跌咗啫。佢又話外國朋友嚟香港，都會帶佢哋去行山，如果朋友行到好辛苦，佢就會鼓勵對方上到山峰之巔以欣賞「東方之珠」嘅美景，非常值得。
凌慶雲：見過牛食燒烤牛扒
近日流傳一則大媽喺溪澗沖涼嘅消息，環球前景慈善基金會主席凌慶雲認為咁做，恐污染環境同水源，況且當眾出浴，其他山友見到都唔開心啦。講起自然環境，凌話見過有牛隻喺燒烤場食遊人留低嘅牛扒，又有野豬食豬扒，生態循環出現嚴重問題，希望大家都愛惜大自然，帶走自己垃圾喇！
卓妮