政情：藥效未過 黃定光戴黑超開會

籲「三高」人士定期檢查眼底

象哥解釋話，佢自己大約三個月前做咗白內障手術，今日就趁晏晝開會前去咗覆診，醫生見象哥差唔多一年時間冇檢查過眼底，於是就順便檢查埋。之不過，醫生需要向眼球滴藥水，放大瞳孔先可以檢查清楚，但瞳孔變大亦會令雙眼變得怕光，由於開會時藥效未過，象哥覺得會議室啲燈光太強，於是就戴番副黑超喇！

象哥又話，患有高血壓、高膽固醇或者高血糖嘅人，即係大家俗稱「三高」嘅人士，最好就要定期檢查眼底，因為醫生可以通過觀察眼底搵到好多潛在嘅健康問題喎。資料顯示，透過眼底檢查可發現視網膜剝離、視神經炎、黃斑病變、青光眼等眼科疾病，亦可以監測住因「三高」而引致嘅血管變化。