中環出更：陳連基：社會勿忽視精神健康
現代人既要有良好體魄，精神健康亦相當重要。自閉症、精神分裂、腦退化症等患者，係一批需要社會照顧嘅社群，統稱為「無精神行為能力人士」。精神健康資訊匯（MIP CRC）主席陳連基，就因為曾經親歷照顧呢類人士，對其苦況不但感同身受，更明白到會衍生唔少棘手嘅問題。
陳提到自己童年時，嫲嫲患有認知障礙，除咗十分健忘，又經常懷疑唔見咗嘅物件係遭到他人偷去，爸爸如何辛苦照料嫲嫲，佢至今仍記憶猶新。佢又話老人家冇記性後果可以好嚴重，譬如有家傭趁老僱主唔記得嘢，呃走數十萬，甚至有啲呃埋層樓，就算後來東窗事發，追討或索償都相當困難，甚至求助無門。而機構內嘅專業人士如醫生、律師等，可以為當事人提供意見，畀佢哋得到實質幫助。
余林如君為照顧個仔辭工
副主席余林如君，本身就係一位照顧者，因為佢嘅囝囝自細就有自閉及腦癇症，儘管依家已經三十幾歲，但仍然係一個「大朋友」。余太回想照顧嘅日子，好慨嘆咁話真係好辛苦同好艱難，又指以前嘅年代唔似得依家，處處受盡白眼，當時更辭去工作專心照顧囝囝。余太話依家香港喺呢方面都發展得幾完善，坊間有唔少嘅相關嘅團體以提供支援。
榮譽法律顧問黃煦珊就憶述感受至深嘅個案，就係遇到一家人為咗遺產，就爭住照顧病患，以圖從中獲利，實在教人難以接受。至於創會成員羅潔明雖無親身經歷，但就有一套保持精神健康嘅方法，就係有任何唔開心都會搵人傾訴，講完就冇事，而佢亦會由從事財富及遺產策劃嘅工作過程中，一有機會接觸到病患、照顧者等，羅就會主動同佢哋傾吓偈，盡己所能力去開導他人。
卓妮