政情：植潔鈴唔叻「煲冬瓜」 兒童故事變限制級
潮流玩意日新月異，近期內地流行一款可以邊食糖邊聽故事嘅棒棒糖。東區前區議員植潔鈴（Elaine）亦緊貼潮流即刻喺內地網站買嚟開箱實測。之不過，由於故事係以普通話播放，自認「煲冬瓜」麻麻地嘅Elaine就話聽到成人內容，搞到畀網民話呢個玩意教壞細路呀！
開箱實測故事棒棒糖
Elaine日前上載咗條開箱短片上Facebook介紹呢款棒棒糖，個故事只係播咗一陣，佢就忍唔住大笑，話竟然聽到呢句「輕輕地摸王子的乳頭」。明明呢個係兒童故事，因乜解究Elaine會聽到呢啲成人內容呢？
原來係因為Elaine嘅普通話差，對佢嚟講聽普通話故事就好似估歌仔咁，咁難怪會聽錯內容啦，仲搞到畀網民話呢款棒棒糖教壞小朋友添！睇嚟Elaine真係要畀心機學吓普通話，唔係嘅話下次又會鬧出笑話。