政情：專家疫下焗留港 助黃大仙祠加快翻新
因應疫情關係，唔少工程項目都受到延誤。創立於一九二一年嘅嗇色園黃大仙祠都因為殘舊嘅緣故而做緊翻新工程，但新冠肺炎疫情底下進度反而快咗喎。點解呢？
嗇色園黃大仙祠嘅翻新工程已經進行咗一年半，黃大仙祠監院李耀輝日前出席活動開幕禮嘅時候話，希望翻新工程可以喺下年嘅百周年慶典前完成。因負責翻新工程嘅專家都來自內地，礙於往返中港需要進行檢疫措施，一眾內地專家惟有留喺香港，所以工程進度反而快咗喎。而疫情下黃大仙祠需一度關閉，佢話閉館期間冇善信嚟參拜，間接再度加快咗工程進度添！
引進半立體式牆介紹典故
咁其實翻新後有乜嘢唔同呢？李耀輝話黃大仙祠雖然古色古香，但都需要應用新科技，達致與時並進嘅效果。佢舉例話，翻新後會有半立體式嘅牆壁配以銅片浮雕，希望藉此介紹黃大仙嘅典故同埋相關歷史。另外，佢話黃大仙祠喺疫情期間都有舉行網上祈福，亦已經採用現代化管理，以後仲會陸續加入其他新元素咁話喎。