政情：公民講場：旅發局離地推介 天價團注定失敗

政府放寬本地遊旅行團人數限制，而尋日就係一連三日長假期之始，但一眾經營本地遊嘅旅行社未見受惠，事關唔少市民都寧願選擇自己安排行程。雖然旅遊發展局早前推出「旅遊．就在香港」計劃，希望刺激市民留港度假同消費，網頁上更精選本地團推介，但部分價錢非常離地，例如長洲一日遊團費過千元，以食腸粉為招徠嘅深水埗遊亦盛惠五百多元。目前經濟疲弱，天價團費嘅本地遊好難搵到捧場客。如何喺恢復通關之前撐住整個旅遊業，睇嚟旅發局主席彭耀佳真係要諗諗計喇！