政情：公民講場：流感疫苗一針難求 衞署急需諗計補救

好多市民都趁住冬季流感高峰期來臨之前接種流感疫苗。有醫生指出近日到私家診所注射流感疫苗嘅市民比往年多出兩倍，目前欠缺嘅季節性流感疫苗高達三萬劑。市民見私家診所嘅流感疫苗「斷貨」，勢必轉往公立醫院門診接種流感疫苗。雖然港府今年訂購八十七萬劑疫苗，以應付本周四開始推行嘅本年度「政府防疫注射計劃」，但參考舊年數字，單係小學生同長者就需要八十萬劑疫苗，有專家估計好大機會唔夠用。其實疫情之下，流感疫苗嘅需求大增實在可以預期，如今市面出現「一針難求」嘅情況，衞生署署長陳漢儀係咪要諗辦法解決呢？