政情：民主黨涉搶偷選票 立會秘書處或報警
立法會因應新冠肺炎疫情而延任一年，新一立法年度會期喺上周展開，喺一連兩日嘅事務委員會正、副主席選舉期間，三名民主黨議員分別被指涉嫌干擾選舉，其中許智峯涉搶選票、黃碧雲同尹兆堅分別涉偷走選票同埋投多一票。有建制派議員對事件感不滿，認為雖有議員以個人身份報案，但因涉議會事務，建議由立法會秘書處報案。秘書處回應話已向行政管理委員會報告，會再尋求進一步指示。
向行管會尋進一步指示
議員陳恒鑌尋日就話，所牽涉嘅選舉同埋派票工作都係涉及議會事務，認為由秘書處報警會比較妥當，所以佢就其建議聯絡咗立法會秘書長陳維安。被問到建制派會唔會就今次一連串嘅事件，對涉事議員提出譴責動議，陳就認為，依家有好多譴責議案要處理，估計將新提出嘅譴責議案放上大會審議需時逾一年。秘書處回覆查詢時就話，秘書處將就上周發展事務委員會及環境事務委員會主席選舉期間發生嘅事件向行管會匯報，並會就陳恒鑌嘅建議尋求行管會進一步指示。
本身許智峯因「搶手機案」而遭建制派提出譴責動議，嚟緊立法會亦會討論相關議案。被問到會唔會擔心建制派再提出新嘅譴責動議，許就話已經「預咗」，更已經問咗幾個法律意見，不過最後點應對都係「兵來將擋」，一切都要視乎民主黨嘅決定同安排。