政情：斥「議會戰線」齋噏 陳諾恒退出公民黨
全國人大常委會早前通過立法會議員延任一年，而民主派同抗爭派亦曾就此事引發爭議。繼前議員陳淑莊、深水埗區議會副主席伍月蘭先後退黨，入黨約兩年嘅沙田區議員陳諾恒尋日喺Facebook宣布正式退出公民黨。至於點解，佢話覺得民主派喺議會內任人魚肉，睇唔到民主派點守住議會戰線。
嘲無力反抗 任人魚肉
陳諾恒喺一七年退出民主黨，翌年加入公民黨，佢尋日就話日後會以「沙田區政」身份繼續服務市民，仲提到「睇嚟入黨真係唔啱我」。佢回應時指，最初都尊重公民黨喺延任問題上話考慮留任，但喺上周睇完立法會多個事務委員會嘅正、副主席選舉後，就覺得民主派係無力反抗、任人魚肉，甚至未能凸顯建制派主政嘅醜陋，所以睇唔到民主派點守住議會戰線。另外，組織「監察DQ議員大聯盟」尋日去政府總部請願，批評泛民議員喺六成選民支持離任下仲選擇留任係違反承諾，仲批評佢哋喺早前事務委員會正、副主席選舉上拉布同埋不合作，促請立法會主席梁君彥將佢哋趕出立法會。