政情：港台無王管 前景迷茫 議員倡私有化省公帑

「到時不論好壞 廢台都無所謂」

會議上，議員蔣麗芸話港台部分員工對現階段情況迷茫，促請公務員事務局加強公務員對《基本法》及《港區國安法》嘅認識。而議員何俊賢就批評港台耗費公帑，建議資訊科技及廣播事務委員會選出主席後，舉行聯合會議，討論港台私有化、獨立嘅可能性。佢話倘若有人收購港台，就唔使繼續花費公帑，到時無論港台好定壞、甚至「廢台」都冇所謂。

不過，資訊科技及廣播事務委員會尚未選出主席，下次選主席嘅時間就定喺本周五。睇嚟何俊賢提出嘅議程就算獲得批准，都要一段時間後先可以討論喇。

恃獲編輯自主 屢次違反約章

而出席會議嘅泛民議員就繼續為港台「護短」。佢哋話港台雖然係政府部門，營運上可免除商業壓力，但公共廣播機構需要維持編輯自主，但某程度上編輯自主同政治壓力又有衝突，希望可以釐清番喎。

雖然公共廣播機構要有一定嘅編輯自主，但都應該有所限制，反而港台多次被指冇遵守《香港電台約章》囉！之前有政界人士話，港台作為公營機構並冇積極宣傳國家安全教育之餘，《香港電台約章》更流於「口號式」。而港台顧問委員會早前都話港台對《香港電台約章》嘅落實有嚴重落差呀！

唔單止咁，通訊局曾指港台節目《左右紅藍綠》違反《電視節目守則》嘅規定，並向港台發出嚴重警告；港台節目《The Pulse》亦被商務及經濟發展局指違反一個中國原則。而廣播處長梁家榮屢次冇即刻認錯，經常被外界炮轟後先「跪低」，唔知係咪因為佢早已公開表示不打算再續約，所以唔在乎呢？