政情：憂受制裁牽連 有問責官向陳振英求教
現時中美兩國處於角力狀態，美國政府先後兩度向中港兩地官員作出制裁，令本港唔少政圈中人擔心會受牽連。金融界議員陳振英（Ronick）透露，近日有個別問責官員、常任秘書長同建制派議員向佢徵詢意見，考慮開設多幾間唔同銀行嘅戶口，分散投資。
資產應考慮多元化配置
Ronick話做好個人資產嘅風險管理係一件非常合理嘅事，所以當有人向佢查詢時，佢都會樂意提供意見作参考。佢強調，任何人管理自己嘅資產時，都應該考慮多元化配置，唔應該過分集中喺某一個類別。
佢又話呢點尤其適用於政界人士，所以建議佢哋喺使用銀行服務，以至同信用卡公司、證券公司、資產管理公司等其他服務供應商往來時，唔應該太過集中，應分散風險。
繼美國財政部八月公布制裁十名香港同內地嘅官員，以及一名前官員，華府日前再根據《香港自治法》向國會提交報告，宣布再制裁其中十人，並警告國際金融機構唔好同受制裁人士交易，否則可能亦會被嚴厲制裁。