中環出更：房屋問題招怨 網民寸爆黃偉綸
政府今年施政報告嘅公眾諮詢大玩新模式，喺網上收集市民意見之後，相關嘅局長就會拍片解答市民問題，變相畀市民一個批評各局長嘅平台。至於積累大量民怨嘅房屋問題，發展局局長黃偉綸就梗係走唔甩喇。
促訂立空置稅 加快市區重建
政府成日話房屋問題係香港嘅深層次矛盾，但唔見得有積極解決問題，而市民就把握機會積極向黃偉綸表達意見喇。有網民建議盡快訂立空置稅，以及限制公共房屋不得於私人市場出售。亦有市民提到香港有好多舊樓同舊式工業大廈，促請政府加快市區重建。香港輪候公屋問題嚴重，唔少市民被迫住劏房捱貴租，有人話希望政府實施租務管制，要用到半份人工租樓實在慘不忍睹。
城市規劃議題同樣值得關注，有網民就寸爆問黃偉綸，市民嘅活動係咪三十年不變，好似只係可以踩單車，覺得局方應該增設跑步徑、行山徑等唔同活動，令市民有更多選擇。
卓妮