中環出更：唐煒邦炮製炮製蘋果蓉西多 食材冇浪費
疫情下唔少人都減少外出食飯，除咗買外賣返屋企食之外，亦都可以留喺屋企自己煮住家飯。城市青年商會早前就喺網上舉辦廚神挑戰賽，一眾執行董事局成員都喺鏡頭前施展渾身解數，同大家分享一系列「唔浪費」嘅佳餚添！該會副會長唐煒邦就整咗好美味嘅「蘋果蓉西多士」，最特別嘅地方就係佢完全冇用剩任何一樣食材，認真有衣食。
「食得晒先至好嗌，咪做大嘥鬼！」政府近年不斷宣傳，希望市民唔好浪費食物，唐煒邦就做咗一個好好嘅榜樣。製作呢款西多士需要三樣食材，包括蘋果、方包同雞蛋。喺片段入面，唐先將蘋果切開，將一部分再切成細粒用嚟做餡，多出嚟嘅就分畀屋企嘅小朋友食，而個蘋果芯就畀咗屋企嘅寵物食。之不過，整西多士嘅方包需要飛邊，唐就將呢啲切出嚟嘅麵包皮，沾上用唔晒嘅蛋漿一齊煎，完全冇浪費到一丁點嘅食材添！
吳狄燐用冷飯整燒味粥
香港人除咗鍾意食茶記西多士，唔少人都好鍾意打邊爐。同為副會長嘅劉建新就講到，大家好多時打邊爐都會用剩好多食材，但食完一晚打邊爐後，第二晚未必會想繼續，所以要換另一種食法食埋佢。劉就話，好多人都會將呢啲食剩嘅肉類同丸類，留低喺深夜食消夜時送麵食，但其實用嚟整壽喜燒亦都係唔錯嘅主意，而且做法仲非常簡單添！
另一副會長吳狄燐就分享咗好美味嘅「燒味粥」，用料包括冷飯同埋食燒味食剩低嘅燒鴨同白切雞。吳先將燒味放入水度煮成上湯，三十分鐘後將啲雞同鴨撈起去骨後，加入冷飯一齊煲就可以食，佢仲笑言剩低落嚟嘅骨可以留低做肥料添！
卓妮