政情：畀特首零蛋不足以洩民憤 民研眾籌搞負數評分

香港民研總監鍾庭耀話，未來會喺抽樣電話調查內加入起碼兩條題目，包括「0至+100」分外，每位被訪市民再會被問及「-100至+100 」會點畀分，-100為絕對不支持，0係一半一半，100則絕對支持，甚至會問到「-1000至+1000」或「-50至50」，未來亦會喺「我們香港人」網上平台加入此實驗。

鍾仲話，過去有唔少市民提出，儘管畀特首零分仍然覺得唔開心，希望畀負評分先可以「感情上發洩吓」，相信唔同量尺就有唔同嘅畀分方法，希望透過實驗，觀察分數嘅分布形式有何不同。該眾籌至尋日三點半已籌得逾三萬五千港元，扣除平台手續費則有三萬三千七百港元。

六成市民不滿抗疫表現

此外，民研喺上周四至前日，就是否滿意政府應付新冠肺炎疫情嘅表現，訪問咗逾八千名市民，超過六成市民不滿政府表現；另七成六民主派支持者反對長期不在香港居住嘅居民擁有投票權，非民主派支持者就有三成七反對。