政情:神隱兩月終現身 何啟明見前黨友

就任勞工及福利局副局長已經有兩個幾月嘅何啟明「神隱」多時,近日終於再度現身,聯同佢老細、勞福局局長羅致光,喺立法會會見一眾前黨友兼工聯會議員陸頌雄、榮譽會長陳婉嫻等人,工聯會向局方反映,希望政府推出新一輪防疫抗疫基金,積極考慮推出臨時短期救濟措施,支援失業同停工人士,幫助佢哋渡過難關。

被質疑英文水平不足

話說何啟明入咗熱廚房之後冇幾耐,大約係六月初嘅時候,羅致光喺一個電台節目話對方需要時間適應新工作同掌握政策範疇,當時並冇打算畀佢落立法會回應質詢,又話可能要等到換屆之後先有相關安排。

屈指一算,依家已經過咗兩個月,每月人工由大約十萬元攀升到最少廿萬元嘅何啟明,喺記者會上曾經被質疑能力,尤其係英語水平不足以勝任工作,答英文問題嘅時候更加要拎「貓紙」幫拖,真係醜態百出啊。唔知何啟明有冇把握喺立法會休會呢段時間,特登搵專人惡補吓啲英文咁呢?

第一手消息請下載on.cc東網iPhone/iPad/Android/Windows Phone Apps