港府指引官員遭冒犯可先離席
黃大仙區議員莫嘉嫻日前喺Facebook上提到，話該區新任民政專員黃智華幾日都冇覆區議會主席許錦成電話，但喺處理立法會選舉提名時就好快咁取消港島區參選人嘅資格。莫嘉嫻仲形容，依家區議員同民政署嘅關係已經跌到冰點，同埋話民政署近日就新冠肺炎疫情，喺慈雲山做檢測、清潔都唔聯絡區議員。
莫嘉嫻又指政府早前更新內部指引，列明政府官員代表要點樣應對區議會會議，包括當區議員若作出冒犯同埋侮辱言詞，可先行離席。
對於更新指引，政府發言人就回應話根據運作經驗同工作需要，不時更新內部通告，供各部門相關人員參考，仲話今次更新通告，旨在向相關人員提供處理區議會事務方面嘅清晰指引。