政情：丟飯碗叫人課金 戴耀廷圖網上重生
違法佔領行動（佔中）發起人之一嘅戴耀廷，上月籌辦立法會選舉民主派初選，事後被指涉嫌操控選舉，甚至違反《港區國安法》。戴早前亦被香港大學解僱，飯碗不保後就另闢新財路，搞咗個「法治重生」計劃，美其名叫大家付款訂閱資助佢，探討本港法治出路喎。有政界人士就鬧爆戴耀廷巧立名目，利用網上平台搞變相眾籌，亦係換另一個新舞台繼續反中亂港，按道理警方國安處應該盡早調查，引用港區國安法嘅罪名拘捕戴。
戴早前被港大解除佢嘅法律學院副教授永久教席，事後戴就話會向校監林鄭月娥上訴，但外界絕大多數人料上訴難被接納，戴最終可能都要告上法庭。唔好以為戴垂死掙扎係出乎佢意料之外，實情佢早喺二○一五年港大校委會成員組成出現變化同啟動程序檢視佢永久教席嘅去留時，已經心知肚明被人「叮」硬。
政界籲以國安法拘捕戴
「23萬監察」發言人王國興指，戴參與咁多場反中亂港風波，加上依家本港政場上，建制民主陣營所代表嘅勢力仍在爭鬥，有時唔係話戴想走就可以走，形容戴係「百足之蟲，至死不僵」，死唔斷氣喎。
其實王國興咁講都有迹可尋，事緣戴在港大飯碗不保之後，就積極向市民同支持者推銷自己嘅網上專屬頻道，話大家可以透過每月付款訂閱其頻道，去一齊思考本港法治前路喎。換句話講，呢個所謂「法治重生」付費平台，係唔係佢為自己重生嘅吸金平台呢？
對於戴呢個新平台，王國興就鬧爆，話冇咗港大個舞台去荼毒青年，就換另一個新舞台去反中亂港、滲透反對意識。王又指，既然依家港區國安法已經生效，而戴涉嫌觸犯有關法例嘅罪證亦確鑿，促請警方國安處盡早以港區國安法罪名拘捕戴。
團體促查初選或涉舞弊
除此之外，新界社團聯會大埔地區委員會，其成員尋日到廉政公署總部，要求廉署徹查戴涉嫌選舉舞弊，以初選操控立法會選舉。佢哋指摘戴發起嘅初選活動，涉嫌操控立法會選舉參選人，從中剝奪他人嘅選舉及被選舉權，更直斥戴喺初選之後，恐嚇若有參選團隊唔遵從初選結果，將遭到選民唾棄。他們又認為相關說法已涉嫌觸犯《選舉（舞弊及非法行為）條例》，要求廉署正式立案徹查，以保障有意參選人嘅應有權利，確保選舉公平公正。