中環出更：黃梓謙嘆百年書店結業 「有書揸手先係享受」
辰衝作為一間擁有百年歷史嘅老牌書店，對好多人嚟講都係不可或缺嘅回憶。平等機會委員會委員黃梓謙（Gary）雖然趕唔切喺書店結業當日舊地重遊，但都拜託朋友幫佢買咗唔少書，同時為書店結業感到可惜。
Gary話好多人第一次去辰衝都係求學階段，不過佢就有啲唔同，係負笈英倫之後返港，先至第一次踏足辰衝，目的係為咗尋找部分政治人物傳記之類嘅冷門書籍。佢話好多冷門書都只係辰衝先至搵得到，所以間中都會落去揀吓心頭好。Gary又話自己比較守舊，唔鍾意電子書同埋網上書店，始終都係置身實體書店同揸本書喺手慢慢揭，至談得上係一種享受囉。佢話辰衝結業雖然可惜，但大家與其緬懷實體書店，不如諗吓點樣支持書商行業，呼籲有能力嘅人都幫吓手，否則香港嘅書店只會買少見少喇！
蕭偉強喺附近遇上一生摯愛
勞工及福利局前局長蕭偉強都係辰衝嘅忠實Fans，佢話升讀中一首次踏足呢間舊式書店，當時屋邨街坊都話讀名校先至要去辰衝，單係入去排隊搵書就覺得同所謂嘅精英沾上邊，光宗耀祖嘅感覺油然而生。不過，辰衝帶畀蕭偉強嘅唔單止係知識喎，蕭仲喺呢間書店附近，遇上佢嘅結婚對象添！佢感嘆咁話，記憶雖然隨着書店愈來愈遠，但嗰份情味仍會歷久常新。唔知佢講緊老婆定係書店呢？
再度去辰衝尋找回憶嘅仲有資訊科技界議員莫乃光（Charles），佢話辰衝陪住佢成長，亦都係當年睇英文書、買英文雜誌嘅好去處。Charles估計自己同其他人一樣，係再次返去尋找回憶。但幾十年過去，佢覺得大家無論係讀書，定係買書嘅習慣都改變咗，認為辰衝喺呢個時候離開，可能都係明智嘅選擇喎。
卓妮