中環出更：牛年不利 郭偉强開會失聲
新一年未必有新開始！經過農曆新年假期後，立法會各個委員會尋日起陸續開會。公務員及資助機構員工事務委員會就示範咗何謂出師不利，事關主席郭偉强一開會就「失聲」，真係唔多吉利喇！
該委員會尋日透過Zoom開會期間出現技術問題，喺會議室2A主持會議嘅郭偉强本身打算準時開會，但佢個收音咪就出現問題，唔單止係沙沙哋聲，仲甩甩咳咳、斷吓斷吓，即使秘書處職員幫郭換咗3支咪，情況都冇改善。
早前風波不斷 揸車開會惹議
郭開場發言講咗幾分鐘，但一班議員都聽唔清楚郭到底講乜。議員廖長江就忍唔住舉手反映郭嘅「失聲」問題，另一議員何俊賢亦都建議暫停會議5分鐘處理。最終會議暫停大約10分鐘，秘書處先成功解決技術問題，郭終於有番把靚聲。
話時話，郭喺舊年一直風波不斷，喺今年一月中旬開房屋事務委員會議時，被揭發邊開車邊開Zoom惹起極大爭議，仲要去警署自首，唔少人都期望佢喺新一年可以轉轉運。之但係，踏入牛年第一日開會就「失聲」，聽起上嚟好似唔多吉利喎。卓妮