政情：黃碧嬌直播 重演跪低一幕

公園地磚凸起累人 投訴未果

話說一開Live，就見到黃碧嬌走嚟走去，仲指住啲地磚，跟住就開始「回帶」嘞！點解？事關要案件重演。佢朝早喺公園急步走過，畀地下凹凸不平嘅地磚絆倒，跌傷咗雙膝同左手，佢即場示範當時跌低嘅經過，仲話：「呢次真係跪低喇！」短片所見，佢膝頭腫晒同擦損咗，左手手掌亦都腫埋。

之後佢喺社交平台上載咗呢段短片，見佢愈講愈氣憤，話嗰塊地磚凸起成吋，唔少人都中招，於是佢用「雪糕筒」同花盆遮住地磚，等啲街坊注意，但係冇耐又畀人拎走啲雪糕筒，而佢由三月起已向有關方面多次投訴，都冇人處理。

佢話之前已有個老街坊仆親，成個月都落唔到公園，估唔到今次輪到自己。其實喺現場已經有多名街坊好關心佢嘅傷勢，猛叫佢睇醫生。事後見佢喺社交平台上載咗張相，有位女士幫佢捽緊隻手，雙膝就敷冰，佢就留言話睇咗跌打嘞！