政情：建制包攬行管會 陳健波：保安問題等住傾
立法會內務委員會（內會）經歷完一輪選主席風波後，逐漸回復正常，行政管理委員會同埋查閱立法機關文件及紀錄事宜委員會嘅成員亦都塵埃落定，喺民主派集體杯葛下，行管會截止提名前都冇民主派議員報名，結果成員全數由建制派議員包攬，成員陳健波（波哥）就話嚟緊開會都好多事項要傾，包括保安、設施等問題都要盡快跟進。
商討入會議廳要過X光機
過往建制派同民主派都會自行協調行管會人選，再加上以前內會副主席都係泛民出任，所以行管會少有「清一色」都係建制派議員。波哥話，開番會之後好多嘢都要傾，包括立會保安問題，之前發生咗幾次民主派議員掟臭味物品，如果下次帶啲腐蝕性液體入去就真係大鑊，要認真商討吓以後議員進入會議廳係咪要進行X光機檢測咁話。另外仲要快啲成立各委員會，因為實在有好多設施需要跟進，好似音響、電腦等係咪需要更換或者升級，都要逐一去討論。