政情：陳敏娟疑孭鑊辭職 梁家榮何時肯擔當
近日港台風波備受各界批評同關注，有唔少市民同團體要求廣播處長梁家榮問責落台，但處於風眼中嘅佢至今仍安然無恙，反而港台署理副廣播處長（節目）陳敏娟就以健康理由提出請辭，懷疑幫梁「孭鑊」！對於呢個消息，港台顧問委員會成員狄志遠尋日就喺電台節目上話，對陳辭職感到詫異，又指就算要交人頭都唔到陳喎，因為班同事都好維護陳。
陳獲讚表現專業勇對挑戰
被問到事件有冇涉及政治壓力，狄就覺得睇唔到有所謂嘅政治壓力牽涉其中，佢亦讚陳敏娟表現專業且積極面臨挑戰，對於港台節目嘅解說亦具說服力，講到一班顧委會委員好安心咁話。既然做得咁好點解仲要走呢？狄講到就算交人都交唔到陳，咁應該交邊個呢？分分鐘梁家榮做到約滿，都冇人需要為事件負責。
至於陳敏娟嘅接任人選方面，狄個人建議應交畀熟悉港台運作嘅人負責，而港台節目製作人員工會主席趙善恩都話，唔希望當局喺接任人選上，任用唔熟悉節目製作嘅人去做。