政情：搗亂內會 泛民又圍主席台 7分鐘11人被逐

講番早前選主席風波，民主派議員多次喺開會前就率先衝出主席台，等到會議一開始就高叫口號同舉起標語，有次甚至拎一塊黑色布圍住自己同埋班保安添。尋日係反修例風波一周年，一班民主派議員有意故技重施，早喺開會前已進入會議室，唔止喺自己座位上擺放「香港人毋忘六一二」等示威標語，仲拎埋行去主席台，高叫「毋忘六一二 香港人反抗」等口號添，當時就有班保安分隔佢哋同埋主席台，以防佢哋衝擊。

鄺俊宇1分鐘唔夠「收工」

喺李慧琼宣布會議開始後，專業議政莫乃光、葉建源、邵家臻同李國麟就主動離開會議室，其後李慧琼就點名警告胡志偉、陳志全等民主派議員，要求佢哋返回座位，唔好阻礙會議進行，不過警告多次都冇人理會。

正當李慧琼嘅警告被當成「發噏風」，佢嘅黨友陳恒鑌、何俊賢就提出規程問題，指民主派議員妨礙會議，要求李慧琼執行《議事規則》趕人離場，有人更揚言報警處理。然後李慧琼就開始趕民主派離場，先每隔一分鐘趕一個議員，包括胡志偉、陳志全、民主黨許智峯、議會陣線朱凱廸。跟住就喺一分鐘內，接連趕走民主黨尹兆堅、議會陣線毛孟靜、公民黨譚文豪離場；然後下一分鐘就趕工黨張超雄、民主黨黃碧雲。最後又變番一分鐘趕一個人，包括公民黨楊岳橋同埋民主黨鄺俊宇，其中鄺係一踏入會議室就衝出去示威，逗留未夠一分鐘即被驅逐。

拉布武鬥同失效 如廢武功

民主派議員憑拉布已難有效果，依家就算用武鬥，都喺短時間內被趕離場。今屆會期剩番一個月多少少，唔知班民主派會喺被趕離場方面刷新紀錄，抑或有新抗爭手法呢？