政情:鄉紳上京告狀 目無皇發?

香港不時有政黨及團體上京拜訪,好似上星期就有屏山鄉鄉事委員會主席曾樹和同新界社團聯會會長梁志祥帶領三十多名新界村民、村代表及鄉委會主席上京告御狀,話港府喺擴建堆填區及將新界土地納入郊野公園等問題上明恰新界人,而好多政策亦對新界人唔公平。據聞今次告御狀之旅令鄉議局內部非常不滿,話有鄉紳想架空鄉議局,莫非今次告御狀之旅其實暗藏玄機?

梁志祥隨團 或涉及選舉

話說今次訪京團一開始就打住新界人嘅旗號,由曾樹和做領隊,加上三十多名新界村民及來自元朗八鄉及屏山鄉部分村代表,仲有梅窩鄉委會主席、葵青區地區人士等。不過,同新界有關嘅政策,點解唔係搵鄉議局出頭,而係搵呢三十多名人士呢?有鄉紳好氣憤話,呢班人今次上京簡直就係架空鄉議局,令局內好多人都非常不滿。至於佢哋點解要咁做,而且仲要搵埋梁志祥隨團呢?就可能同選舉有關。

據聞喺港府實施新界村屋僭建申報計劃時,鄉議局早已分開兩個派別,其中一派忠於鄉議局取態,支持申報計劃,另一派就係以屯門鄉事委員會主席何君堯及曾樹和為首,反對申報。雖然事後雙方似係言和,但其實暗地裏仲有根刺。另一方面,鄉議局向來同民建聯(民記)唔多咬弦,加上新社聯同民記站在同一陣線,正所謂「敵人嘅敵人就係朋友」,呢個可能就係新社聯漸漸同曾樹和走埋一齊嘅原因。

唔知企邊面 張變夾心人

另有消息話,鄉議局副主席張學明一直被鄉紳視為民記嘅人,就算佢退出唔選立法會,仍背負住新社聯榮譽會長嘅職銜。經過一年時間,張學明好不容易才淡化民記嘅色彩,稍被認同有資格代表鄉議局,點知今次有鄉紳聯同新社聯訪京被指架空鄉議局,又再令張學明尷尬,真係唔知幫邊方好,最後又要主席劉皇發出面處理事件,咁發叔退休都好難喇。

所以有人猜疑,最後被整蠱嗰位其實係咪張學明呢?

第一手消息請下載on.cc東方互動iPhone/iPad/Android/Windows Phone Apps