中環出更：何啟明入熱廚房 麥美娟：做錯照鬧
政府高層又再出現人事變動，工聯會議員何啟明日前獲委任為勞工及福利局副局長。佢嘅黨友、工聯會議員麥美娟（Alice）尋日話，即使有黨友加入政府，工聯會都會繼續監督，如果做得唔好一定會批評添。睇嚟何啟明要醒醒定定喇，分分鐘黨友都冇面畀！
講番何啟明入政府，Alice就話自己算係比較早就知道呢個消息，原來何啟明決定加入政府前，曾經同Alice商量過。佢仲形容何啟明好熟悉香港事務同埋政策，而且仲了解政府運作添。佢亦話，今次係第一次有工聯會成員加入問責團隊，希望日後可以有更多機會喎。
任期未完 但指未影響立會工作
距離今屆立法會會期尚餘大約兩個月時間，何啟明未完成議員任期就要告別立法會，唔知會唔會影響到其他黨友嘅工作呢？Alice就話，何啟明今次未完成任期，難免令到其他工聯會成員同埋立法會秘書處職員多咗工作，不過都相信政府會有多方面考慮，再加埋工聯會成員多年來嘅合作都非常暢順同純熟，未來嘅工作應該唔會有太大影響。
卓妮