中環出更：做義工服務社群 甄韋喬：學摒棄歧見
本港疫情雖稍為放緩，但去年社會事件所造成嘅社會撕裂，影響非常深遠。願景基金會主席甄韋喬話，為堅持政見而導致家人反目，實在好唔值得。佢話無論一個家庭還是一個社會，都有一啲較政見更為迫切嘅問題，需要大家合力解決。而基金會今年就以「重新出發」作為「十面埋『服』創新服務大賽」嘅主題，希望有心人可以用創意發放正能量，令香港重回正軌。
甄韋喬認為，港人應該將心思擺番喺經濟發展上面。雖然佢對宗教並無深入研究，但講到有一隊服務隊伍，主張透過分享佛學同禪修以傳遞正能量，以及反思日常生活嘅說話同行為，如何影響身邊人嘅做法，感到非常欣賞。佢話若果大家都願意摒棄歧見、放下執着，社會氣氛必定會融洽好多。
擴闊眼光 陳炳光：助多角度思考
願景基金會副主席陳炳光，指年輕人不妨多啲參與社會服務，藉此將眼光擴闊至社會上唔同嘅層面，有利於多種角度來觀察同分析事物。而佢自己就因為做義工，得以親歷一啲溫情嘅故事，譬如有一次同幾位學生去探訪獨居長者，雖然對方乏人照顧，住嘅地方又好狹窄，但當探訪結束，對方都將僅有嘅幾盒飲品送畀小朋友飲。
香港菁英會主席曾鳳珠，佢認為要對抗負能量，最好就係多做運動，因為自己嘅體魄，較任何事物都更為切身。曾鳳珠指疫情緩和學校復課，要生活重拾昔日面貌就不應再糾纏於仇恨喇！佢又提到疫情期間雖然要成日留喺屋企，但都不失係一段幾好嘅時間去思考人生嘅定位。
約莫三個月後就榮升母親嘅菁英會理事陳玉桂，面對小朋友要出生喺呢個紛亂嘅世代，佢同夫婿都一致認為，最重要係下一代懂得明辨是非。佢強調並非要決定小朋友嘅思考角度同立場，不過父母有責任向子女灌輸正確嘅價值觀。
卓妮