政情：內會拉布攞嚟衰 泛民評分齊插水

朱凱廸最甘 跌至2.8分

香港研究協會喺四月四日至五月七日期間，以隨機抽樣方式透過電話訪問逾千名十八歲或以上市民，就自己所屬嘅地方選區同俗稱「超級區議會」嘅功能界別區議會（第二）議員作評分，當中超過一半議員嘅評分較上次調查低。今次調查涵蓋嘅十七名非建制派議員中，其中有十六人嘅評分出現下跌，當中跌得最多嘅係朱凱廸，今次評分為二點八分，比上次大跌零點四分。

跌幅緊接朱凱廸嘅兩名議員，同樣都係來自公文袋，分別係譚文豪同埋郭家麒。喺今次調查中，譚文豪得分為二點八五分，比上次下跌零點三九分；而郭家麒嘅跌幅亦同樣驚人，今次得分比上次低零點三三分，得二點六八分。

陳淑莊 郭榮鏗 犯眾怒

講開又講，公文袋嘅議員近日都鬧出不少風波，其中議員陳淑莊早喺上月二日曾經被揭發喺酒吧內「開會」，被質疑涉違反禁聚令，而佢今次嘅評分唔止下跌，喺港島區嘅排名仲被新民黨議員葉劉淑儀超前添。而其黨友、負責主持內委會主席選舉嘅郭榮鏗，開足十七次會議都選唔到主席，搞到內會成為「法案黑洞」，無法處理眾多涉及民生嘅法案。唔知公文袋議員評分全線下跌，係咪同上述所提及嘅風波有關呢。

另外，仲有三名泛民議員嘅跌幅都高達零點三分，其中工黨張超雄今次評分下跌零點三一分，僅得二點五六分；前公文袋議員、議會陣線嘅毛孟靜同民主黨鄺俊宇嘅評分，亦出現零點三分嘅下滑，當中鄺仲係五名「超級區議會」議員中，跌幅最大嘅議員。

今屆立法會仲有約兩個月嘅會期，啲爭議仲陸續有嚟添，睇嚟啲民望都好難升番喇！