中環出更：房署開位管過渡屋 議員鬧爆供應不足
香港土地嚴重短缺，房屋供應不足，令市民冇得安居。尋日立法會審議喺房屋署開一個首長級丙級政務官嘅編外職位，負責監督過渡性房屋專責小組嘅運作。不過就有議員批評，依家過渡性房屋太少，仲有成廿萬市民輪候中，如果第一年只係起得一千個單位，質疑三年提供一萬五千呢個目標，咪變相「凍過水」囉。
廿萬人輪候 首年僅得一千單位
房屋署嘅首長級丙級政務官嘅編外職位，主要嘅工作係包括落實支援非政府機構，推行過渡性房屋項目嘅資助計劃，同埋其他促成非政府機構建議，同推行過渡性房屋項目嘅實施情況。最終議案喺十四票贊成、八票反對下獲得通過，將會交付財務委員會上審議。
議員郭家麒喺會上提到，話關注當局曾指三年內要興建一萬五千個單位嘅進度，仲提到話依家有成廿萬人輪候緊過渡性房屋，如第一年只得一千個單位，去到第三年又會有幾多單位落成。另外議員蔣麗芸就話支持興建過渡性房屋，但政府既然可成功覓地，質疑點解唔去興建公營房屋。
有份出席會議嘅運輸及房屋局副局長蘇偉文就解釋，話興建公屋所需要嘅前期規劃時間比較長，但過渡性房屋就會比較快，層數又會少啲，同埋要考慮閒置土地面對嘅局限等因素，若果政府搵到合適土地就會興建公屋。佢又形容本港房屋問題係相當棘手，話五年後會再作安排。運房局過渡性房屋專責小組項目總監陳立銘就話，第三年會有一萬多個單位落成，所以政府有信心完成過渡性房屋單位嘅目標。
卓妮