政情：公民講場：康文設施解封在即 劉明光要𥄫實咪甩轆

市民困得喺屋企太耐，又冇乜社交活動，真係會屈到病。疫情稍為緩和，政府宣布更多康文設施會解封，例如游泳池、舞蹈室、健身設施同攀登場地等，而市民入場時都要量體溫，亦都有人數限制。雖然呢啲設施重開，市民可以郁動下係好事，之不過，政府抗疫防疫慢幾十拍，呢啲設施重開之後，好難擔保又會有乜嘢甩漏，稍有疏忽就有播疫嘅風險，唔該康文署署長劉明光唔好懶懶閒，要(目及)實班下屬做好防疫措施，咪攞市民嘅健康嚟較飛。